少年成長今日: 1|主題: 15859

收藏本版

回覆發帖

返回列表

跳至頁

查看: 3463 | 回覆: 0

由學業引發的緊張關係 [複製鏈接]

csir3290

子爵府

積分: 10986

1^#

發表於 24-5-5 11:46 |只看該作者 |倒序瀏覽 |打印

同青春期嘅仔女溝通，我相信好多家長都遇過其中一個最大嘅問題就係學業問題，好多時同仔女一傾到學業就會冇計傾，仔女完全唔想同父母溝通，父母關注佢哋嘅學業，但係佢哋就一啲都唔想同父母傾，最後仲搞到大家都唔開心。而最常見嘅就係父母見唔到啲仔女溫習，稍為出下聲啲仔女就好似閂埋咗隻耳仔一樣完全唔想傾。又或者係見到仔女嘅成績差咗，想幫又幫唔到，同仔女傾，仔女又覺得父母煩。又或者係明明細個讀書成績冇問題，但係一升咗中之後成績就大倒退，想幫又幫唔到，要傾仔女又唔同自己傾又係覺得自己煩。好多呢啲問題最後就搞到親子關係越嚟越緊張。

我明白家長當然係緊張自己仔女嘅成績，尤其係想到佢哋嘅前途，如果成績唔好，將來嘅前途一定會難行好多。另外，因為仔女嘅學業表現其實係最容易見到，有冇溫習，成績係咪差咗一睇就知道，所以亦都係最容易成為父母口中嘅問題。但如果想深一層，其實呢個好似一個惡性循環咁，因為當父母發現仔女成績未必達到自己嘅標準時，好多時就會出聲去問，而最容易見到嘅原因就係唔溫習或者懶，咁所以同仔女傾嘅時候自自然然就會用一啲比較嚴厲或者責罵嘅語氣，但係偏偏青春期嘅仔女喺呢啲時候最唔受嘅就係呢啲語氣，你越話佢就越唔想傾，但係唔出聲，父母又好似諗唔到其他方法去幫咁，所以喺父母嘅立場就變成只有經常提醒，但係呢一種所謂嘅提醒，仔女就只會覺得越嚟越煩厭，最終大家嘅關係只有越嚟越緊張。

其實仔女成績唔好，當然唔溫習同懶可能係其中一個原因，但係家長可能忽略咗仔女唔溫習同懶，可能係嚟自於佢覺得點溫都好似係追唔到進度，或者溫極都攞唔到好成績。再加上父母成日喺側邊只係針對佢哋成績唔好，欣賞唔到佢哋做得好嘅地方，挫敗感令到佢哋覺得越讀越冇癮，而且好似成日都達唔到父母嘅要求，可能喺仔女嘅心目中就只係覺得父母唔明白佢哋，所以最終就拒絕溝通。另一種情況可能係自細都讀書成績好，但係去到中學就好似慢慢做得冇咁好越嚟越差咁。我覺得呢種情況最常發生喺啲成績好嘅學校度，正如我之前都講過派得去啲好學校嘅學生可能小學都係成績好嘅，但係當去到成績好嘅中學時，成間學校都係叻嘅學生，而程度亦都畀小學突然間一下子會深咗好多，咁自然就會有比較出現。成績亦都可能冇以前小學做得咁好，父母見到咁嘅情況自自然然就會覺得係成績差咗，爭拗亦都會越嚟越多。但係引致學業發生問題嘅原因有好多，根本就唔能夠一兩句說話就解決，或者只係簡單歸咎於懶。而如果家長經常係集中喺學業問題上面，最終就只會導致到大家溝通唔到。

我自己有個親身嘅經歷，當年我個妹因為年紀同我哋相差好遠，所以到我哋出嚟做嘢嘅時候我妹都仲讀緊書。其實我媽媽同阿妹嘅關係都唔錯，但係典型就係去到中學就成績越嚟越差。我媽媽就經常叫我同細佬教下個妹，但係眼見佢哋爭拗越嚟越多，而大部分嘅爭拗當然亦都係嚟自成績，最終其實我都問我媽媽，究竟關係重要定係成績重要，因為再係咁爭拗落去，阿妹直情開始完全唔睬我媽媽，亦都開始多咗出街。我明白成績好緊要，但係當兩者擇其一嘅時候，我都同我媽媽講話，如果繼續咁落去其實最終只不過係張阿妹越嚟越推得遠，我問我媽媽，如果撇開成績問題，其實當時同阿妹都仲可以有得傾，我話如果想改善母女嘅關係，留返阿妹喺身邊，可能到頭來就真係要放輕鬆啲學業，我話而家雖然好似學業成績唔係幾好，但係都唔代表佢將來嘅一切，話唔定當大家關係改善嘅時候，將來有一天佢會自己突然間醒覺，覺得需要讀書呢！但係如果而家大家嘅惡劣關係再係咁發展落去，最終同阿妹都只會越行越遠，甚至乎大家可能會越嚟越少接觸同溝通，當呀好係呢家度感受唔到愛嘅時候，只不過令佢越嚟越想離開，就算將來前途上面佢發展得點好，但係同媽媽嘅關係就好難會改善到。最終我媽媽都明白關係比一切都重要，亦都真係開始接受阿妹有自己嘅選擇，最終阿妹中三之後就冇讀書，而我媽媽當時亦都同呀妹傾好，底線係可以唔讀書但要搵一啲實用嘅職業訓練去學，最終我媽亦接受呀妹嘅選擇，但係發展到今日其實阿妹已經有自己嘅生意同家庭，而同媽媽嘅關係亦都保持得好好。

所以我覺得有時家長係需要取捨，正如我講當然人人都想自己仔女讀書成績好，起碼將來條路好行啲，但係始終世界都好難事事完美，當要作出取捨嘅時候，家長就真係要深思熟慮諗下究竟乜嘢係重要啲。我唔係話見到仔女學業有問題為咗避免爭拗就乜都唔理，但係用責備或者日娥夜娥嘅方法一定唔係可以好好解決問題嘅方法。學業問題可以有好多原因做成，家長應該深思熟慮諗清楚究竟係乜嘢原因導致，然之後對症下藥。如果真係冇辦法嘅時候，就應該尋求專業人士嘅協助。總之唔好將學業變成同仔女溝通嘅唯一或者係大部分嘅話題中心。如果學業問題變成咗大家溝通嘅障礙，咁父母就應該好好地諗下究竟乜嘢對大家嘅關係先至係最重要呢！