少年成長今日: 3|主題: 15864

收藏本版

發帖

返回列表

跳至頁

查看: 22138 | 回覆: 0

放下 [複製鏈接]

csir3290

子爵府

積分: 11022

1^#

發表於 23-3-12 10:59 |只看該作者 |倒序瀏覽 |打印

前幾日睇電視見到有單好特別嘅新聞，就係話有個家長走咗去自己個仔讀書間中學門口度請願，搞到好大件事又有傳媒去影跟住個家長仲接受訪問。請願嘅原因就係因為佢個仔喺學校畀人打，佢唔滿意學校對打人學生嘅處分，所以最後就用到請願嘅方法。

我唔係想講打人同畀人打嗰個啱定唔啱，但係我總相信世界上係唔會有無緣無故的恨，尤其是係呢個年紀嘅細路仔，最後要喐手一定總會有原因。大家都做過細路仔，衝動打交可能都有試過發生，最後演變到喐手一定係各持己見，好少會係一邊啱曬或者係一邊錯曬。

我想講嘅係呢個家長嘅處理手法，其實佢有冇諗過自己個仔將來點面對呢？佢一路就係講話個仔因為畀人打而有創傷後遺症，所以佢覺得學校對個打人嘅細路仔嘅處分太輕，佢喺訪問強調最少都要打人嗰個細路仔留班先滿意。但係其實香港最重要嘅其中一個核心價值就係跟程序做嘢，唔係話因為要令到你滿意就可以唔理規矩唔理校規就隨便留人班，況且呢個家長其實自己都報咗警，即係話佢唔滿意或者擔心學校嘅處分過輕佢自己都即時用法律程序去解決。但警察處理咗之後到最後都只不過係對打人嘅同學作出警司警誡，即係話其實警察都覺得應該畀個機會咁細個嘅細路仔。學校對呢個打人嘅同學亦都按校規扣咗操行分重要停學三日。講真其實對個細路仔嚟講都已經係好重嘅處分，反而相比起警察可能學校嘅處罰仲重啲！講到最尾都不過係因為涉事嘅大家都係細路仔，其實成年人都係想畀機會佢哋改過從中吸取教訓。但係呢個家長又唔會覺得警察罰得太輕，點解唔告佢上法庭，點解打人嘅細路仔唔需要被羈留等等而走去警署到請願呢？反而走返去學校請願呢？無非可能就係覺得警察唔會因為佢嘅壓力而跟佢嘅諗法去做，但係學校就可能因為家長嘅壓力而順從佢嘅諗法。我唔會估呢個家長咁做背後嘅原因或者動機，我淨係知道佢呢個做法其實對所有人都冇好處。佢可能覺得自己只係保護緊自己同個仔嘅權益，但係呢一種做法就真係保護自己極權益去到極致，即係唔理所有人嘅諗法總之我認為係咁就要係咁。

可能又有人會話被打嗰個唔係你個仔所以你講得風涼，但係試想像一下呢個被打嘅細路仔，佢將來都仲要繼續喺呢間學校讀書，佢將來點樣面對學校，面對自己嘅同學呢？會唔會係人都怕咗佢，怕咗佢嘅原因係因為怕麻煩怕咗佢家長，所以冇人會再想同佢做朋友，況且佢家長咁樣喺學校門口請願，但佢之後仲要繼續每日都要喺呢間學校返學，佢可以點樣面對喺呢間學校將來嘅生活呢？家長話佢個仔有創傷後遺症，但係其實佢而家做緊嘅嘢就係不停咁加劇佢嘅創傷後遺症！講真青少年人嘅拗撬甚至乎打交其實成日都會發生，被打嗰個當然係受害者唔會開心，但係其實打人嗰個背後可能都有佢嘅委屈，作為成年人其實應該係疏導佢哋嘅情緒，從中幫佢哋和解等佢哋學習處理自己委屈嘅時候唔係以暴亦暴亦都唔係衝動隨便郁手，能夠令到大家和解先至係最好嘅處理方法！呢對父母唔咁做不特止反而更加令個細路仔難以面對佢將來生活嘅環境。講真就算畀你最後達成心願，打人嗰個細路仔最終畀學校罰咗留班咁係咪就解決咗個問題呢？其實如果我個仔俾人打，我諗我一定會搞清楚點解兩個細路仔會喐手，當然打人嘅要受到處分但係我覺得應該相信學校嘅處理同埋以和解方法為先，正所謂多個朋友總好過多個敵人。呢個並唔係風涼嘅講法，而家係我哋教導青少年人究竟背後係一個乜嘢嘅理念，成年人成日口講教細路仔就要寬宏大量要守規矩，但喺呢啲事情發生嘅時候正正就係體驗呢啲理念嘅時候。

我更加唔明白嘅係其實如果呢個家長咁唔滿意呢間學校嘅做法，咁即係話呢間學校背後嘅理念同佢唔一致，咁點解仲要繼續落去呢？況且佢呢個做法已經做到咁徹底其實佢個細路仔喺呢間學校讀落去亦都冇乜太大意思！因為每一日要返學面對嘅係佢個仔並唔係呢對家長。又要勉強個細路仔繼續讀落去，但係要面對嘅又係佢個仔，咁究竟呢對家長點解要咁做呢！點解唔轉校呢？係咪因為呢一間係一間名校呢！其實嗰個打人嘅細路仔可能係一時衝動或者受到挑釁先至喐手，但係呢一個被打細路嘅家長而家嘅做法又係咪一時衝動呢！有冇諗清楚佢呢啲做法嘅後果，有冇諗清楚其實佢而家咁做對佢自己個細路仔可能傷害仲大，有冇諗清楚其實佢而家嘅做法其實係教緊自己個細路仔乜嘢嘅價值觀呢！有陣時細路仔一啲學校入面嘅衝突發生，正正就係因為家長冇諗清楚做法就插手，到最後攪到嘅可能只不過係自己嘅仔女。總之學校已經按校規處理做呢件事，你有權唔滿意，如果同學校嘅理念唔一致嘅時候其實應該諗清楚係咪仲繼續留喺度。而唔應該用一啲咁樣嘅方法以為畀壓力學校令學校跟自己嘅諗法去做！到最後又要自己嘅仔夾硬留喺呢度每日返學，獨自去面對。咁最終傷害嘅究竟係打人個學生定係呢個家長被打嘅仔呢！係咪呢個細路仔每日返到學校望住呢個最後因為打佢而留班嘅同學，佢嘅創傷後遺症就會解決呢！有啲人成日把口就只係話被打嘅唔係自己個仔所以講得風涼，但係其實有幾多人真正係從呢個被打同打人嘅細路仔嘅諗法同埋感受出發呢！如果家長自己都唔能夠放下，細路仔又點能夠繼續向前呢！