少年成長今日: 3|主題: 15864

收藏本版

發帖

返回列表

跳至頁

查看: 20749 | 回覆: 0

訴苦 [複製鏈接]

csir3290

子爵府

積分: 11022

1^#

發表於 23-3-19 10:16 |只看該作者 |倒序瀏覽 |打印

又係早前喺網上睇到嘅新聞，有個網民喺港鐵上面偷拍到一對母女嘅對話，大約係個女一路喺港鐵車廂入面同個阿媽喺度呻，覺得自己好辛苦好忙，呀媽又唔明白佢仲搞到冇人鍾意自己。成段對話都有幾分鐘，呢段偷拍片段擺咗上網之後吸引好多人留言，主要嘅討論都係都覺得個細路女好慘，喺香港做學生好辛苦，尤其個細路女應該都係大約二三年班，已經搞到咁忙咁辛苦，所以好多人都覺得個細路女好慘。

成個片段入面其實我哋可以感受到個細路女真係好辛苦，一個二三年班嘅細路女可以講得出呢一番說話，其實佢嘅心理壓力真係好大，佢講到呀媽乜嘢都唔畀佢睇，媽媽所做嘅嘢好似好唔鍾意佢咁，我哋就知道其實家長對呢個細路女嘅管束可能非常之大，甚至乎連玩嘅時間都好少。但我覺得幸好個細路女都仲係細，都仲肯喺阿媽媽面前投訴，都仲能夠同家長講出自己嘅感受。試想像一下好多越嚟越大個嘅細路仔，其實好多嘢都越嚟越收埋喺心入面，根本就唔會同家長講，但係壓力就一路喺個心入面累積，到爆煲嘅時候就一發不可收拾！我明白好多家長好緊張細路仔嘅前途同埋學業，所以好多時都會要自己嘅仔女去學好多唔同嘅嘢同埋補習，一個禮拜嘅時間，日日都排到密密麻麻！但係其實做家長嘅真係要諗下咁細個嘅細路仔係咪真係需要補咁多習呢？其實二三年班只有家長肯用少少時間同佢哋溫下書其實都應該可以應付。至於興趣班方面，我成日都講如果嗰個細路仔所學嘅嘢佢自己都唔覺得係興趣咁只不過係受苦，所以興趣班我始終覺得唔需要多，真係要畀細路仔作為興趣，其實係畀佢用嚟日常調劑，如果連興趣班都玩到咁大心理壓力，咁仲叫唔叫係興趣班呢！而家大人返工做嘢成日都仲要講緊work life Balance，但係竟然而家嘅細路仔反而連玩嘅時間都冇，咁對細路仔嘅成長係咪健康呢！就算佢嘅學業成績幾好都好，其實根本只不過係犧牲咗一個開心嘅童年換返嚟！

另外一點我覺得呢個媽媽喺應對自己個女同自己訴苦嘅時候，都係犯咗好多家長都犯嘅同一個問題，就係經常用問問題嘅方式去應對，好似聽唔明個小朋友講嘅嘢咁，有陣時啲家長就以為透過問問題，等啲細路仔去答嘅時候佢會從中諗清楚件事。但係其實我哋都知道細路仔喺度咁講嘅時候，只不過係想人哋明白佢嘅感受，你可以話佢係發洩，但係呢一種發洩都係希望有人明白佢哋心入面嗰種嘅唔開心，所以你仲不停只係問問題，只不過係話畀個細路仔聽，你根本就唔明白佢，亦都更加證實畀個細路仔睇，你根本就唔知個細路仔諗乜，所以佢同你訴苦根本就係冇用！所以遇到呢啲情況其實家長唔應該再用問問題嘅方式去回應，反而你應該用你嘅同理心去理解去明白佢嘅感受。例如你知道邊個唔同個女玩其實冇意思，反而其實你可能可以同佢講話我明白你一定好唔開心，因為啲小朋友唔同你玩，可以講多啲自己嘅感受甚至乎只係需要攬住佢，一路輕輕拍佢個膊頭畀佢講，千祈唔好加任何嘅批判，盡量畀佢講曬心中嘅唔開心！更加如果喺咁嘅情況，如果當時係返緊學嘅，既然佢咁唔開心可能我就會同佢請一日假畀佢返屋企休息吓，亦都趁呢個機會可以同佢係一個靜靜地嘅地方等佢發洩曬自己啲情緒，然之後大家諗一個可以接受到嘅方案。亦都有啲網民提過其實個細路仔咁大心理壓力真係需要搵專業人士輔導下，我都覺得啱嘅，但係除咗要輔導個小朋友之外，其實個家長更加需要輔導。我哋做家長應該知道不論仔女又好，就算邊個都好，當佢地去到需要搵人訴苦嘅時候，其實最需要嘅就係人哋嘅認同同埋理解，如果你只不過係不停批判佢嘅諗法，不停用大人嘅諗法去希望佢明白，其實到頭來可能都係徒勞無功。有陣時感受就係感受，係唔能夠用道理同佢講，因為嗰個始終係心入面嘅感覺，反而如果能夠去理解同埋感受佢心目中嘅唔開心，到佢慢慢平復落嚟嘅時候先至可以能夠傾到解決嘅方案。不論對乜野人都好，當嗰個人唔開心訴苦嘅時候，問問題係解決唔到任何嘢嘅，只不過係令到訴苦嘅人更加覺得你唔明白佢嘅感受，最終拒絕再同你溝通，拒絕再同你講任何心中嘅感受！